Խաղաղապահները զրահափոխադրիչներով հերթապահություն են իրականացրել Ասկերանի շրջանի՝ սահմանազատման գծի երկայնքով. ՌԴ ՊՆ

Ռուսական խաղաղապահ զորակազմի զինվորականները շարժական հերթապահ խմբերի կազմում բազմակիլոմետրանոց երթ են իրականացրել БТР-82А ժամանակակից զրահափոխադրիչներով և «ԿամԱԶ» մակնիշի մեքենաներով՝ անցնելով ընդհանուր օգտագործման և գրունտային դժվարանցանելի ճանապարհներով Լեռնային Ղարաբաղում: Այս մասին «Առաջին»-ին հայտնում են ՌԴ ՊՆ մամուլի ծառայությունից:

Հերթապահության ընթացքում կողմերի սահմանազատման գծի երկայնքով խաղաղապահները հրադադարի պահպանման ռեժիմի վերահսկողություն են իրականացրել, ինչպես նաև հարցում իրականացրել բնակիչների շրջանում:

«Այսօր մենք մոնիթորինգ ենք իրականացնում Ասկերանի շրջանում՝ կողմերի միջև սահմանազատման գծի երկայնքով, վերահսկում ենք իրավիճակն՝ անվտանգության ապահովման շրջանակում: Երբեմն կանգառներ ենք անում համայնքներում, շփվում ենք տեղի բնակիչների հետ խաղաղության համաձայնագրի խախտումների թեմայով»,- ասել է խաղաղապահ զորակազմի ներկայացուցիչ Անդրեյ Կասյանովը:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Previous Post Next Post