70 տեսակի 250 ծառ, 2800 շիթով շատրվաններ, բրոնզաձույլ 7 արձան՝ մի այգում. կայացել է Երևանի 2800-ամյակի այգու բացման արարողությունը | ՏԵՍԱՆՅՈՒԹ

Ալ.Մյասնիկյանի արձանի հարևանությամբ կայացել է Երևանի 2800-ամյակի այգուբացման արարողությունը, որին ներկա էին ՀՀ վարչապետ Նիկոլ Փաշինյանը, Երևանի քաղաքապետ Հայկ Մարությանը, բարերարներ Միքայել և Կարեն Վարդանյաններն ու բազմաթիվ հյուրեր:
Այգին կառուցվել է «Վարդանյան ընտանիք» բարեգործական հիմնադրամի ֆինանսական միջոցներով և ջանքերով: Այն Վարդանյանների ընտանիքի նվերն է մայրաքաղաքին՝ հիմնադրման 2800-ամյակի կապակցությամբ:

Այգում տնկվել է 70 տեսակի 250 ծառ, տեղադրվել են 2800 շիթ ունեցող շատրվաններ, բրոնզաձույլ 7 արձան, 7 տեսակի գրանիտե քարերով կառուցվել է հին հայկական գորգերի զարդանախշերով 5420 քմ սալահատակ: Դրա կենտրոնական հատվածում տեղադրվել է վարդագույն կվարցիտից պատրաստված Երևանի քարտեզը՝ շրջապատված շատրվաններով: Ստեղծվել է նաև Երևանի քարտեզի տեսքով փորագիր հրապարակ` վերասլաց 45 ջրաշիթերով:
Այգու կառուցման համար ծախսվել է $5.3 մլն: «Վարդանյան ընտանիք» բարեգործական հիմնադրամը, 2019-ից սկսած, 99 տարվա ընթացքում իր միջոցների հաշվին հոգալու է նաև այգու խնամքի ու պահպանության ծախսերը: