Տասը սպանություններից յոթը կատարվել են այլ անձանց կողմից. Ռոբերտ Քոչարյան

«Իշխանությունը պահելու համար ընթացող գործընթացներին ներգրավվել են նաև Ռոբերտ Քոչարյանի և Սերժ Սարգսյանի մերձավոր շրջապատի որոշ անձինք, ովքեր իրենց թիկնազորից կամ այլ անձանցից ստեղծել են հանցավոր խմբեր, որոնց ապօրինի զինել են տարբեր հրազեններով, այդ անձանցից բաղկացած խմբերին ներգրավելով 2008 թ. մարտի 1-ի  երեկոյան և մարտի 2-ի գիշերը Երևան քաղաքի տարբեր փողոցներում իրականացվող քաղաքացիների՝ Սահմանադրությամբ երաշխավորված իրավունքներն ու ազատություններն ակնհայտ խախտող հանցավոր գործողությունների իրականացմանը»,-դատարանում Հայկ Ալումյանը մի հատված ընթերցեց ՀՀ երկրորդ նախագահ Ռոբերտ Քոչարյանին առաջադրված մեղադրանքից, ասաց, այդ մի նախադասությունը բազմաթիվ հարցեր է առաջացնում։
Ալումյանը նկատեց, որ «ներգրավվել»-ն օգտագործված է կրավորական ձևով, հայտնի չէ,  թե ո՞ւմ կողմից են ներգրավել, իրե»նց նախաձեռնությամբ են ներգրավել, թե՞ ոչ։

Բացի այդ, գրված էլ չի, թե որ անձինք են, նշված չէ, այդ որոշ անձանցից գոնե մեկի անունը։

«Նշված չէ, թե ում կողմից են որոշ անձինք ներգրավվել, և նշված չէ, թե այդ որոշ անձանց գործողությունների պատասխանատվությունը ինչ առումով է դրված պարոն Քոչարյանի վրա, ինչու այդ պատասխանատվությունը պետք է կրի պարոն Քոչարյանը։ Այս մեղադրանքը ևս հնարավոր չէ վիճարկել հիմնավոր կասկածի տեսանկյունից»,-ասաց Ալումյանը։

Այստեղ Ալումյանի խոսքը շարունակեց մեղադրյալի կարգավիճակ ունեցող Ռոբերտ Քոչարյանը, ասաց, գործում չկա որևէ տող, թե ինչ քննչական աշխատանքներ են իրականացվել այդ որոշ անձանց հետ, ձերբակելվե՞լ են, թե՞ ոչ, կան այլ քրեական գործեր, թե՞ ոչ։

«Ես կարող եմ ենթադրություն անել, թե ինչի համար է սա գրված։ Տասը սպանության փաստեր այս քրեական գործում ընդհանրապես չկա, այս դրվագն այսպես անորոշ կերպով մտցրել են մարդկանց ուղեղը մտցնելու համար, որ այդ սպանությունները կարող են կատարված լինել մերձավոր անձանց կողմից։ Այլ հիմնավորում, թե ինչու է այս դրվագը մտցվել մեղադրանքի մեջ, չկա, ուրիշ բացատրություն ես չունեմ»,-ասաց նա։

Քոչարյանը հայտարարեց, 10 սպանություններից առնվազն 7-ը արվել է այլ անձանց կողմից։
«Առնվազն 7 սպանությունները կատարվել են այլ անձանց կողմից, ոչ ոստիկանների, ոչ էլ բանակի»,-ասաց նա։