Ստեղծված քաղաքական իրավիճակում միակ ելքը հանրաքվեի չեղարկումն է


«Իշխանությունները ոչ մի կերպ չեն կարողանում որոշում կայացնել հանրաքվեի ապագայի հետ կապված։ «Արտակարգ դրության երկարացումը հարցի լուծում չէ. օրենսդրորեն էլ որևէ ճանապարհ չկա, և որքան էլ Վահե Գրիգորյան, Տիգրան Եգորյան, Արման Բաբաջանյանի տրիադան փորձի Ազգային ժողովում լուծել հարցը, խնդրի ցանկացած արծարծում` խորհրդարանի միջոցով, հակասահմանադրական, հակակոնվենցիոն է։

Ժամանակին էլ խոսում էին դատավորների վեթինգ, անցումային արդարադատություն անելու մասին, բայց դրանք բոլորն արհեստական օրակարգեր էին, որոնք, բնականաբար, չհաջողվեց իրականացնել։ Միակ խելամիտ ելքն այն է, որ Ազգային ժողովը որոշում կայացնի, ու չեղարկվի հանրաքվեի որոշումը»,- ասաց հայտնի սահմանադրագետներից մեկը:

Իսկ նման որոշում կայացնելու իրավունք ունե՞ն։ «Դե, եթե ԱԺ-ն իրավունք ունի հանրաքվե նշանակել, ուրեմն իրավունք ունի նաև այն չեղարկել և իր ընդունած որոշումն ուժը կորցրած ճանաչել»:

Ի դեպ, կարո՞ղ են կրկին ճնշումներ գործադրել ՍԴ դատավորների վրա` մեկ-երկուսի հրաժարականին հասնելու համար, ընդհուպ մինչև ընտանիքների նկատմամբ ռեպրեսիաներով, ինչից հետո հարցը մեխանիկորեն կլուծվի։

«Դուք կարծում եք դատավորներից ինչ-որ մեկին կամ նրանց ընտանիքներին խնայե՞լ են մինչ այս, ճնշումների հարցում ինչ կարողացել են, արել են։ Ե՛վ ընտանիքների, և՛ երեխաների նկատմամբ, չնայած հիմարություններ անելու հարցում այս իշխանությունների երևակայությունն անսահման է»:

Բա ի՞նչ է լինելու։ «Ստիպված կլինեն արտակարգ ռեժիմը ձգել-ձգել` գուցե մինչև մեկ տարի»: Միևնույն է՝ կվերջանա, չէ՞։ «Դե այդ ժամանակ յա՛ էշը կսատկի, յա՛ իշատերը»»,-գրում է «Հրապարակ» թերթը: