«Փրկեք երեխային». Մարգարիտա Սիմոնյանը կոչով դիմել է հայերին

«Ռոսիա սեգոդնյա» և RT միջազգային տեղեկատվական գործակալության գլխավոր խմբագիր Մարգարիտա Սիմոնյանը դիմել է ունևոր հայերին և խնդրել, որ օգնեն 7 տարեկան Էմիլի Մանուկյանին, որի մոտ չարորակ ուռուցք է հայտնաբերվել:

 «Ես գիտեմ, որ շատերի, եթե ոչ բոլորի մտքերն ու սրտերն այժմ ռազմաճակատում են, որտեղ ամեն օր մարդիկ են զոհվում, և այդ մահերը դուք ի զորու չեք կանխել։ Ես գիտեմ ձեր էթնիկ համերաշխության ու փորձանքի մեջ հայտնված հայրենակցին օգնության հասնելու մասին։ Ահա կյանքի կամ մահվան մի պատմություն, որը կարող եք կանխել հենց դուք»,-գրել է Սիմոնյանն իր Telegram-ալիքում։

Նա հավելել է, որ ինքն արդեն միլիոն ռուբլի է փոխանցել երեխային օգնելու համար:

«Որպեսզի ավելորդ հարցեր չլինեն` ես փող եմ ուղարկում ոչ միայն հայ երեխաներին և ընդհանրապես նրանց տոհմածառերն ուսումնասիրելու սովորություն չունեմ։ Բայց քանի որ ինձ ակնհայտ պատճառներով շատ հայեր են կարդում, այդ պատճառով չեմ կարող նրանց չդիմել»,-պարզաբանել է Սիմոնյանը։

Նշենք, որ Էմիլին հիվանդացել է մեկ տարի առաջ։ Նրա մոտ ախտորոշվել է ձախ մակերիկամի նեյրոբլաստոմա։ Տասը ամսվա ընթացքում նա քիմիաթերապիայի կուրս է անցել, ուռուցքը հեռացրել են, ոսկրածուծի փոխպատվաստում արել: Վերջին վիրահատությունը կատարվել է օգոստոսին, և հիմա աղջիկը վերականգնվում է։ Բժիշկների կոնսիլիումը խորհուրդ է տալիս իմունոթերապիա անցնել «Դինուտոքսիմաբ բետա» դեղամիջոցով։ Դեղը գրանցված չէ Ռուսաստանում, շատ թանկ է, բայց Ռուսաստանի առողջապահության նախարարությունն ընդունում է դրա արդյունավետությունը: Անհրաժեշտ է հինգ կուրս, յուրաքանչյուրի համար` հինգ ամպուլա, իսկ մեկ ամպուլան արժե ավելի քան 1 մլն ռուբլի։ Գումարի մի մասը հավաքվել է, սակայն միջոցները դեռ բավարար չեն։

Էմիլիի ընտանիքն ավելի քան 20 տարի ապրում է Ռուսաստանում, նրանք ՌԴ քաղաքացիներ են, աղջկա հայրը փականագործ է, մայրը` մանկապարտեզի նախկին աշխատակից: