Մոսկվան
ընդհանուր առմամբ նշում է կառուցողական տրամադրվածությունը, որը Բաքուն եւ Երեւանը
ցուցադրում են Ռուսաստանի, Հայաստանի եւ Ադրբեջանի փոխվարչապետների նախագահությամբ
եռակողմ աշխատանքային խմբի շրջանակում: ՌԴ ԱԳՆ պաշտոնական ներկայացուցիչ Մարիա
Զախարովան այսպես է մեկնաբանել Ադրբեջանի նախագահ Իլհամ Ալիեւի վերջերս կատարած
հայտարարությունը «Զանգեզուրի միջանցքի» մասին:
«Դրա գլխավոր խնդիրն է տարածաշրջանում բոլոր
տնտեսական եւ տրանսպորտային կապերի ապաշրջափակման մասին բարձր մակարդակով ձեռք
բերված պայմանավորվածությունների իրականացումը: Մենք հույս ունենք, որ նույնպիսի
դրական նպատակաուղղվածությունը եւ շփման փոխընդուների կետերի որոնումը կգերակշռի
Ադրբեջանի եւ Հայաստանի ինչպես պաշտոնական մեկնաբանություններում, այնպես էլ մեդիա
տարածքում»,- ասել է Զախարովան:
Հիշեցնենք, որ Ալիեւը Հայաստանին մեղադրել է «Զանգեզուրի միջանցքի ստեղծման» հետ կապված խոչընդոտների մեջ: «Մենք պատրաստ ենք համագործակցել (Հայաստանի հետ): Արդեն քանի՞ անգամ են փոխվարչապետները հանդիպել: Հիմա Հայաստանը հրաժարվում է համագործակցությունից: Հիմա Հայաստանը ցանկանում է խանգարել Զանգեզուրի միջանցքի իրականացմանը: Բայց նրանց դա չի հաջողվի: Մենք նրանց կստիպենք... Ներկայումս ակտիվ աշխատանք է տարվում Զանգեզուրի միջանցքի գործունեության ուղղությամբ, կան բազմաթիվ առաջարկներ, տրանսպորտային եւ հաղորդակցության բազմաթիվ նախագծեր արդեն քննարկվում են, եւ դա կլինի մեր հերթական պատմական հաջողությունը»,- ասել էր նա:
